الرئيسيةبحـثالتسجيلدخولتسجيل دخول الاعضاء

شاطر | 
 

 إيه هوه قانون العقوبات ويعنى إيه جنحه وجناية ومخالفة والفرق بينهم؟

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
امجد عدلى
رئيس محكمة المنتدى
رئيس محكمة المنتدى
avatar

كلمة مفيدة : : المحاماه كلمة للحق ورسالة للعدالة
__________________


المهنة :
احــتـرام قــوانـيـن الــمنـتـدى : :
الجنس : ذكر

عدد المشاركات : : 56
تاريخ التسجيل : 04/03/2011

مُساهمةموضوع: إيه هوه قانون العقوبات ويعنى إيه جنحه وجناية ومخالفة والفرق بينهم؟   الأربعاء أكتوبر 26, 2011 5:14 pm


إيه هوه قانون العقوبات ويعنى إيه جنحه وجناية ومخالفة والفرق بينهم؟

قانون العقوبات ده القانون اللى فيه نص العقوبة لأى شخص خالف أى قانون
وقانون العقوبات تم وضعه سنة 1937 وآخر تعديل ليه كان سنة 2003 والعقوبة
فيه محددة لأى جريمة والجرائم مقسمة لتلات أنواع وكل نوع ليه محكمة مختلفة
وهيه:

المخالفات: هى الجرائم اللى بتكون عقوبتها غرامة مبتزيدشى على 100 جنية
وليها محكمة وممكن الشخص يتصالح ويدفع الغرامة فى النيابة بس مفيهاش
استئناف والمخالفات دى زى مخالفات المرور ومفيش استئناف للأحكام اللى
بتطلع فى المخالفات يعنى الحكم بيبقى نهائى.

الجنح: الجنح دى اللى الجرائم فيها العقوبة بالحبس أو الغرامة زى جرائم
الضرب واستعمال القسوة من ضباط الشرطة أو جريمة الإحتجاز بدون وجه حق وأشد
عقوبة فيها الحبس 3 سنين والجنح ليها محكمة اسمها محكمة الجنح وبيحكم فيها
قاضى واحد وفى كل قسم شرطة فى محكمة جنح مخصصة لمحاكمة المقيمين بدائرة
القسم يعنى المقيمين مثلا فى الدقى تبقى محكمة الجنح اللى تبعهم محكمة جنح
الدقى ومش لازم المتهم يحضر بنفسه ممكن يحضر عنه محامى بتوكيل ماعدا قضايا
السرقة والبرشام لازم المتهم يحضر بنفسه وأحكام محكمة الجنح ممكن المتهم
يستأنفها فى محكمة اسمها محكمة الجنح المستأنفة وبيحكم فيها تلات قضاة
ويتوقف تنفيذ الحكم لحد ما المحكمة تحكم ماعدا بعض الجرائم اللى فيها
الحبس وجوبى زى جريمة السرقة أو إحراز أقراص مخدرة " برشام " وممكن الحكم
يتلغى اللى طلع من محكمة الجنح وممكن يتأيد لكن فى كل الأحوال المتهم ممكن
يعمل نقض فى الحكم وفى محكمة النقض ممكن تتعاد المحاكمة مرة تانية بس
محكمة النقض مبتوقفشى تنفيذ العقوبة سواء كانت حبس أو غرامة.

الجنايات: الجنايات يعنى الجرائم الكبيرة زى القتل والتجارة فى
المخدرات والتعاطى والسرقة واللى يعمل عاهة مستديمة أو اللى يعذب متهم
عشان يخليه يعترف والمتهمين فى الجرايم دى بيتحاكموا فى محكمة اسمها محكمة
الجنايات وطبعا أى حكم بعقوبة من محكمة الجنايات اسمها سجن مش حبس يعنى
مينفعشى نقول حكمت محكمة الجنايات بحبس والصح نقول حكمت محكمة الجنايات
بسجن لأن فى فرق بين حكم الحبس اللى بيطلع من محكمة الجنح وحكم السجن اللى
بيطلع من محكمة الجنايات عشان الحبس كعقوبة أخف من حيث المعاملة والمكان
داخل السجن ومفيش حبس مشدد لكن السجن ممكن يكون مشدد والمتهم لازم يقضى
المدة كلها بدون إفراج بعد مضى مدة من سجنة ولازم أقل مدة للسجن المشدد 3
سنين ومتزيدشى عن 15 سنة ومكان السجن بيبقى مشدد ، والعقوبات فى محكمة
الجنايات تلات أنواع وهيه السجن والسجن المشدد والسجن المؤبد والإعدام
وأحكام محكمة الجنايات بتصدر من تلات مستشارين وفى كل الأحوال مفيش
استئناف للأحكام بعد الحكم بالسجن المتهم بيروح ينفذ العقوبة وطبعا ممكن
المتهم يعمل طعن فى الحكم فى محكمة النقض لكن محكمة النقض مبتوقفشى تنفيذ
العقوبة بيفضل المتهم مسجون ولو محكمة النقض الغت الحكم تتعاد المحاكمة
تانى فى محكمة الجنايات غير المحكمة الأولانية يعنى بيتغير القضاة اللى
حكمه عليه قبل كده والمتهم يفضل مسجون لحد ما يصدر حكم فى إعادة المحاكمة
لحد ما تحكم المحكمة بالبراءة أو بتأييد الحكم بالسجن وملحوظة تم الغاء
عقوبة الأشغال الشاقة.

محكمة أمن الدولة العليا " طوارىْ" :

محكمة أمن الدولة العليا طوارىء دى محكمة مشكلة بقانون الطوارىء وفيها
بتتم محاكمة المتهمين اللى بيعملوا جرائم قانون العقوبات قال عليها مضرة
بأمن الحكومة والدولة زى جريمة التجمهر وكمان جرائم قلب نظام الحكم
والإنتماء أو تشكيل تنظيم بالمخالفة للقانون العام والقضايا دى اللى بيحقق
فيها نيابة اسمها نيابة امن الدولة والمحكمة بتتشكل من 3 قضاة وممكن رئيس
الجمهورية اللى يشكلها ونظامها زى محكمة الجنايات لازم المتهمين يحضروا
بنفسهم بس المهم ان احكامها مينفعشى ينطعن عليها فى محكمة النقض أحكامها
نهائية لكن العكس لو المتهم أخد براءة لازم رئيس الجمهورية يوافق عليها
وممكن يرفض البراءة وتتعاد المحاكمة من تانى .


____________@ مـنـتـدى مـحكــمــة مــصــر @__________

@__ Egycourt.alafdal.NeT __@







الرجوع الى أعلى الصفحة اذهب الى الأسفل
http://egycourt.alafdal.net
 
إيه هوه قانون العقوبات ويعنى إيه جنحه وجناية ومخالفة والفرق بينهم؟
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: قسم المنوعات القانونية :: المنتدى العام-
انتقل الى: